TRINITY

Hriat ve chinah Trinity hi thupui khelin kan khel chiah thin lo naa, kan sawi diklo zo dawn niin ka hria, hriat ang ang tlem kan rawn telh ve lawk (Helam sawina group a awm tho chungin): . Trinity hi Biblical term a ni lo naa, Bible-a Pathian, Pa leh Fapa leh Thlarau Thianghlim-a a inpuanna sawi fiah nan hman a ni fo thin. Pathian pakhatah hian minung pathum (persons) an awm a, heng te hi Pathian pathian pathum an ni lova, Pathian them (parts) an lova, lan dan (modes) an ni lo bawk. Chatuan Pathian pakhat an ni.OT in a sawi ber chu Pathian chu pakhat a nih thu a ni. "...Lalpa kan Pathian CHAUH chu Lalpa a ni a..." (Deut 6:4). Pathian dang reng reng an awm lo (Deut 5:7ff). Tritheism chu a hnawl hmak tih a chiang.Mahse OT hian trinity thawm riva a pai ve tlat. "Pathian" ti mai lova "Pathian Thlarau" (Gen 1:2 and passim) a tih ve deuh reng thu te hi ngaihtuah ila. Gen 1:26 leh 11:7 -a plural hman a ni tlat mai te pawh hi. Gen 18-a Abrahama tlawhtute chungchang pawh hi: v.1 ah "Yahweh" a hnenah a inlar a, a han en chuan "MI PATHUM an lo ding reng a..." tih a ni. Sawi zawm zel ila - An han titi chho a, an pathum zinga tu ber nge tawng tih sawi lovin, anmahni sawi nan "Yahweh" hman a ni zel tawh.Sam 33:6 -a "thu" leh Thuf 8:12ff-a "finna" te pawh hi sawifiah fe tham a awm. Isaia 48:16 te ang te hi chang buaithlak tak a ni a, monothiestic context kara trinity lam hawi a ang tlat.NT ah pawh hian trinity sawi chianna awm lem lo (1 Jn 5:7 hi chu dah tha ta ila). Mahse evidence chu a tam khawp mai. Pathian chu pakhat a ni tih chu a chiang (Gal 3:20). Chutih laiin Isua hian Pathian a nihna a sawi tlat (Jn 8:58). A zirtirte'n amah an rinna leh an biak (worship) hialna pawh pawm tlat (Jn 16:16; Jn 20:28). "Thu" leh "Fapa" a nihna hian a Pathianna keng tel tlat bawk (Jn 1:1 - Logos awmzia, Greek leh Hebrew lit. ah sawi tur a tam mai). Paula chibai bukna thu, 1Cor 1:3 ah te hian Pa Pathian leh Krista inlaichinna thuk tak kan hmu a, he inlaichinnaah hian Thlarau/ Thlamuantu hi rawn zeh tel a ni bawk (Jn 14-16)An pathum hian Mat 3:16f., Isua baptima chan naah khan sawi tel vek an ni a, zirtirte kha Pa leh Fapa leh Thlarau Thianghlim hminga Baptis tura tirh an ni bawk (Mat 28:19). 1Pet 1:2-a an pathum a sawi dan pawh hi intluk tlang an nih loh chuan a buaithlak tlat - mihring chhandamna atana an pawimawhzia a sawi avangin. Fapa leh Thlarau Thianghlim hi Pathian ni ve lo ta sela Paula malsawmna sawi dana Pa leh Fapa leh Thlarau Thianghlim a tel deuh kher thin hi sawi fiah a harsa viau bawk.A chunga mi chauh pawh ngaihtuah khian, Bible han bih chian ngar ngar hian," Trinity "Pathian pakhata minung Pathum" tih hi Bible-in min kawhhmuh chu a ni mai lo maw?" kan ti a ni. Tin, Pathian chungchang a nih miau avangin, thil siam chhiarkawpa "Pakhat" tih hian a Siamtu nihna hi a sawifiah phak lo (he thu hi cliched deuh tawh mah se a dik miau si!) "Pakhat a nia Pathum a ni bawk thei lo" tih ringawt hi Pathianah chuan a dik tlat lo! Tin a tawp berah chuan, "Bible" kan tih hian OT leh NT hi ngai pawimawh ve ve thei thin ila a tha ka ti. Christian tan chuan a pawimawh zawk, a dik zawk, original zawk a awm chuang lova, an pahnih hian pumkhat an ni a, an in sawifiah tawn a, Pathian hmangaihna leh mihringte chhandamna chanchin an sawi ve ve a, an inkalh lo a ni.