GENESIS: NI, THLA LEH ARSITE SIAM HMAIN ENG A AWM THEI EM?

Ni khatna ah chuan: Gen.1:3 Tin, Pathianin, “Êng lo awm rawh se,” a ti a. Tichuan êng a lo awm ta mai a. 1:4 Tin, Pathianin êng chu a en a, tha a ti hle a: tichuan Pathianin êng leh thim chu a then ta a. ....tichuan tlai lam a awm a, zing lam a awm bawk a, a ni khatna chu. Ni lina ah chuan: Gen.1:14 Tin, Pathianin, “Chhûn leh zân thenna tûrin vân boruak zau takah chuan êntute awm sela, chûngte chu chhinchhiahna te, hun bi te, nî te, kum te hriatna tûr ni rawh se: 1:15 lei chung ên turin vân boruak zau takah chuan êntute awm bawk rawh se,” a ti a: tichuan chutiang chu a ni ta a. 1:16 Tichuan Pathianin êntu ropui zawk chu chhûn rorel tûrin, êntu ropui lo zâwk chu zân rorel tûrin a siam a: arsite pawh khi a siam bawk a. Pathianin ni khatna ah eng a siam a, ni lina ah Ni leh Thla leh Arsite a siam leh chauh niin a lang ta a, helai thu hi Bible ringhlel tute sawi nuam tih lai tak pawh a ni reng bawk a. Bible chhung atang vekin he lai thu hi chinfel i han tum dawn teh ang. Gen.1:1 A tirin Pathianin lei leh van a siam a....... Heta kan chhinchhiah tur pawimawh tak chu- Pathianin Lei leh van a siam ni hi Bibleah ziah lan a ni lo- tih hi. Heaven (Van)ah chuan eng awm? Ni te, thla te, arsi / galaxies. Hebrai context a kan en chuan 'heaven and earth' in a kawh chu universe pumpui ( the entire created universe) hi a ni. Chik lem loh chuan, a tirah Pathianin lei a siam phawt a, chu mi hnuah Ni leh thla leh arsite siam leh chauh niin a lang thei a, mahse hei hi a dik a nih chuan, " A tirah Pathianin engmah lo (nothing) leh earth a siam, ti a ziah a ngai dawn a ni. In man thiam em? Hei vang hian confi takin, a tirah Pathianin lei leh universe pumpui (heavenly bodies) te a siam a ni tiin kan sawi ngam ang. Hebrew a 'siam' tih hmanna hi chi 4 a awm a. 1) Bara - hei hi awmlo atanga thil siam chhuak (create) tihna. 2) Asah- hei hi 'make/ produce' sawina, eg, Pathianin tui a then hrana, boruak zau tak a siam tak kha/ Lei awm tawhsa atanga thlai chiten mahni chi awmdan an chhuah ang kha. 3) Banah - build, eastablish, Adama atanga Evi a siam chhawn te, insa tihte, chhungkaw din, tih sawina. 4) Yatsar- to form, fashion, plan etc., ruahman, thuam tha etc.sawina, eg, vaivut a thuam tha a, mihring ruangam angin a siam. Tichuan, Gen.1:1 ah hian 'bara'/create chu hman a ni ta a ni. Joba bung 38 ah kal daih ila.. Joba 38:4-9 Leilung nghahchhan ka phûm lai khan khawiah nge i awm? I hriat thiam chuan sawi rawh. A len lam bite tunge thliah, i hre meuh maw? A nih leh, a chung awl tehna tunge zam? A nghahchhan chu khawiah nge a din ngheh a, Tunge a kil lung phûm ni, Varparh arsite an zai khâwm a, Pathian fate zawng zawng an au lai khan? Hei hi Gen.1:1 chhunzawmna chiah a ni. A tirah Pathianin lei leh van, arsite a siam a, lei lenzawng turte pawh a bithliah a, chutih lai chuan *Lucifer a la hel lova, Pathian fate zawng zawng hlim takin Pathian fakin an au a nih chu. Evi thlemtu Rul phenah khan Lucifer/setana a awm a; Evi a thlem hma, hetih lai hi chuan Lucifer/setana pawhin hlim takin Pathian a fak ve ngei ang tih a hriat theih a, Chuti anih chuan he hun hi Adamate siam an nih hma daiha thil thleng a ni tih a rin theih a ni. Joba leh Daniela ziak kan en chua Pathian fapa/fate zawng zawng' tihah hian Lucifer/setana hi a tel ve ngei tur a ni e. Tichuan, hun eng emaw chen a liam hnu chuan *Lucifer/setana a hel ta a, Pathian hnen atanga paih chhuah a ni ta a. Heng a hnuaia Bible thute hian Bubulon leh tura Lal phena awm setana chungchang a rawn sawi lang a ni. Isaia 14:12 Aw 'varparh,' 'zing lam fapa,' engtizia nge van ata i tlak tak chu le! Hnam tin titlâwmtu, engtizia nge lai sah thlaka i awm tak chu le! 13 I rilruah chuan, 'Vanah ka chho vang a, Pathian arsite chung lamah khian ka lalthuphah ka chawi sâng ang; tin, inkhawmna tlâng, hmâr tawp reta awmah chuan, ka thu ang a: 14 chhum aia sâng zawkahte khain ka chho vang a; Chungnungbera ang maiin ka awm ang, i tih thin vei nên khan. 15 Nimahsela Seol-ah, klhuarkhurum tawp retahte chuan, hruai thlakin i awm dawn si. Ezek. 28:12.......Tha famkim tak, finnaa khat, mawina tinreng! 13 Pathian huan Edenah i cheng; Lunghlu tinreng i in bel a, Sardion, topaz lung leh diamond. Berul, Onuks, jaspi, sapphir, smarakdin, karbankul, A phûm nghehna a ziak mawina rangkachaka siamte Nangmah siam nîa buatsaih tawhte chu. 14 Nang chu vengtu cherub hriak thih i ni; Pathian tlâng thianghlimah ka wmtîr chia, Meivam iang lung zingah i leng. 15 I tha famkim siama i awm ni ata, Nangmaha khawlohna a awm hmâ rêng zawng. 16 I sumdawnna a pung tual tual, A tikhat che pawngnêkin, Sualah i lo tlu e, Pathian tlâng hnawmhnêa'n ka hnawl che, Vengtu cherubin a hnawt chhuak che, Meivam iang lung zing ata. 17 I mawina vanga lo chapovin, I ropuinain i finna tikhawlovin, Leiah ka paih chia, Lalte hmâah mualah ka pho che-ennawmah. Hetih lai hian khawvelah Dinosaurs, homonids, java man, peking man, reptiles hote, archeology in an fossil a hmuh chhuahte hi an cheng a ni mahna, (hei hun hi Gen.1:1 leh 1:2 inkara hun rei tak tla zep, Gap theory innghahna hi a ni, Bible in engmah a sawi lang lem lova, mahse Gen.1:2 a Lei a lo ruak ta ngawt mai te, tuiin a chimpil vek mai leh alo thim mup mai hi a a chhan kan zawn chuan he hunah hian Pathian duhoh zawng thil lian tham tak a thleng anga, thim leh tui hmangin khawvel chu hrem a ni ta a ni ang tih hi a rinawm em em a ni. Lucifer/Setana hel hnu fe ah chuan Pathianin Lei chu thuam that a duh ta a, chu chu Gen.1:2 a kan hmuh chiah, "Lei hi a chhia a, a ruak a....a thim mup a" (Hebrew: Tohu wa bohu- Eng-chaos, desolate- rauhsan) a tihna chhan chu a ni thei ta chiah a nih chu. Engvanga tui chung chu lo thim mup nge a nih? Bible hian a chhan min hrilh chiang khawp mai.. Joba 38:8-9 Tuipui chu chhula a lo chhuah lai khan Tuin nge kawng lo khar hnan? A silhfen atân CHHUM ka siam a, A tuam puanah THIM chhah tak; Lucifer/Setana hel hnu chuan lei chu thim chhah takin Pathianin a tuam a, chhum nasa takin a khuh bawk a, Ni leh thla leh arsite a hliah thim vek tihna a ni, chu chu Pathian Thlarau chuan a awp reng a ni. Tichuan, khawvel thim mup tawh chu nunna a awm leh theih nan chei that (repair) a lo ni leh dawn ta a ni. Gen.1:3- Ni khatna-ah chhum chhah tak lak kian then a ni ta a, eng a lo awm ta, mahse direct in ni leh thla leh arsite a la lang thei lo a, an eng erawh chu a lang thei ta a ni.. Ni 2-naah tui a then hrang a, boruak zau tak, nunna awm theihna tur a siam ta a. Ni 3-naah tui te chu a then fel leh veka, khawmual a lo lang ta a, thlaite pawh a siam ta bawk a, photosynthesis a awm thei nghal bawk ang. Ni 4-na ah chuan, chhum te chu lak kian fel a ni ta a, ni leh thla leh arsite a takin a hmuh theih ta bawk..hei hi hun chhinchhiahna atana a pawimawh a, Hebrai tawngin 'Owth' leh 'Moedim' tih a ni. A hnua Pathianin ala siam tur ramsate, savate leh mihringte tana hun chhinchhiahna, day, month, season, year te chhin chhiah nan a pawimawh dawn tih a hriat vang a ni. Helaia thilsiam chung changah hian 'bara' kha hman a ni tawh lo ta reng a, 'asah' (made) tih hi hman a ni. 2 Petera 3:5-6 Heng hi an haider lui si thin: Pathian thuin hman laiin vante a lo awm a, lei pawh tui ata leh tui zingah awm khawmin a lo awm a; chungah chuan chu mi laia khawvel awm chu tuiin a chim a, a boral ta, tih hi; Hei hi tuilet sawina a ni thei a, Khawvel hmasa, tui leh thim hmanga hrem tak chungchang sawina pawh a ni thei e. Bible hi dual meaning/triple meaning/ Multilayer......awmze eng emaw zat nei thei a ni si a.