NOVA TUILET

Japan Tsunami rapthlak tak ka thlir reng laiin, ka ngaihtuahna vak velin hmana ka thuziah ka rawn herlum leh mai mai. Nia, Chhandamna ni mang si lo, ringtu nun a chawm lo te pawh in lo ti maithei. Mahse kei, rinnaa pachhe ve tak mai hi chu heng thute hian Bible hi min chhiar tamtirin Pathian min hnaihtir ve fo thin a nia. A enga mah zir mang si loin ka rawn hypothesize leh dawn a, mahse ka rin dan nghet tak a ni. Khawvel thiamnaa kan lo hriat dan erawh an kalh deuh rep rep. A sei deuh lo thei lo, ka la tawi ve nasa, chuti chung chuan a pawimawh nia ka hriat chin a thuak in ka rawn tlar ve a ni e. . TUILET A AWM TAK TAK EM? . Hnam hrang hrang zingah hmanlaia tuilet thawnthu an lo nei deuh vek mai hian Nova hi phuahchawp mai ni lo, awm tak tak a nihzia a tifiah lehzualin ka hria. Babylonian-ho thawnthu epic of Gilgamesh-a Utnapishtim hi a lar pawl tak a ni awm e. . Hindu Pathian Trimuti zinga ‘god of preserver’ Vishnu pawh hi a tawng tobulah chuan ‘ Man of Nu’ah ’ tihna a ni (Nova hi Hindu-hoin an Pathian chungnung ber pathum zingah an lo chhiar reng a nih chu). . Chutiangin Egyptian leh Chinese-ho paw'n an lo nei vek mai. A vai chuan tuilet thawnthu hi 500 chuang a awm anga ngaih a ni. Mizo paw'n Ngaiteii thawnthu pawh kan neih ve chhap hi, tuilet lam chu a ni lo nang a. . ENGVANGIN NGE TUI A LET? . Tuilet hma khan hybrid sex a theih thu hi Bible-in a sawi. Pathian fapaten (vantirhkohten) mihring fanute sex an hmanpui a, mihring pangngai aia chungnung zawk demigods an lo piang ta a, chungho chu mihringten pathianah te an be ta hlawm tlat a ni. Chu chu Pathian lak atanga penbona bupui chu a ni. Chungho tihboral nan leh khawvel an hruai bo ta lutuk tihtawp nan a ni, tui a letna chhan chu ni. Tin, tuilet hnu hian hybrid sex leh thlarau khawvel atanga duh duha rawn in-materialise chu khap a ni ta a nih hmel, sawi tur a awm leh ta lo. . Tun thlenga kan kan hmuh - Egyptian, Babylonian, Chinese, Greek, Roman leh Hindu mythology-a an pathiante zawng zawng hi chungho leh an thlahteho chu an ni. (He laia Pathian fapate hi Kaina thlahte an ni ang tih ngaih dan pawh a awm a, mahse Bible pum en chuan a pawmawm loh). . Higher life form atanga lower life form-a an rawn kal dawn hian taksa an mamawh a, khatih hun laia ransa an duh duh kha an rawn hmang mai thin a nih a rinawm bawk, Eden huana Setana'n rul a hmang ang khan. A nih loh leh khawvel hmasaa an lo hmelhriat tawh sa pawh a ni mahna. Mythology a awm dawn chuan base eng emaw a neih ngei ngei a ngai a, chuvang chuan ‘mythology phenah hian thu dik a awm’ tih hi a rinawm em em a ni. . ZAWHNA - . Mak ka tih chu Adama te kha leilung luah khat tura thupek mai ni lo, khawvel pum mai chu huana siam tura beisei an ni a, chutih laiin kan khawvel hmelhriat erawh chu a luaha luah khah chi rual loh, thlaler sa lutuk, chhim leh hmar tawp vawt lutuk, ramhnuai pik lutuk, kawr ruam thuk leh chhengchhhe lutuk, tlang sang awih pangper lutuk an ni nuk hlawm bawk si. Tin, thi loa mihring inthlah pung nasa lutuk han dah nan chuan khawmual a pe tlem lulai lutuk, tuiin a chim nasa lutuk bawk. Tin, thawmhnaw inbel kha bawhchhiatna rah a nih si chuan, khawvel temperature chu a extreme a awm tur a ni lo leh bawk….. . Chutichuan tuilet hma khawvel chu kan han suangtuah dawn ta a ni. A hmasa berah chuan tunlai khawvel topography hi chu a ni thei lo hrim hrim . A chhan chu Pathianin mihringte luah khat tur leh khawvel pum mai chu huana siam tura thu a pek chuan thlaler lum leh khawro lutuk, vur ram vawt lutuk, kawr ruam thuk leh chhengchhe lutuk, ramhnuai pik chhah lutuk, tlang awih lut leh sang lutuk te hi an awm tur a ni lo hrim hrim a ni. A hmasa berah chuan tuilet hma kha chuan khawvel pumpui hi phaizawl cham deuh vek a nih hmel. Khawvel pumpui a chim si a (Khawvel pumpui a ni lo deuh tih rinna pawh a awm a, mahse tanchhan a nei chau lutuk a, Bible a kalh bawk a, sawi lo law law mai ila). Tui chuan lawng chu a vawrh sang zel a, tlang sang ber te pawh a khuh a, lawng chhunga ramsa lian tak tak te ni 100 chuang nuamsa taka an la thawk theih dawn chuan 4500mt aia sang a ni thei lo hrim hrim. . Hemi aia sangah chuan rei tak a thawk theih tawh lo. Chumi awmzia chu Mt.Everest (8900mts+) te hi khatih hun khan an la awm lo a ni ang. Continental drift, plate tectonics leh earth’s tilting te hi tuilet vanga lo awm a ni thei ta tlat a ni. . Bible-ah chuan khawmual lang miah loin tuiin khawvel chu a chim vek thu min hrilh a, (Post hmasaah Khawvel hmasa hremna a nih ka rin thu ka sawi tawh kha). Chuan Adama tana khawvel a'n din thar leh khan tui chu a then a, tui leh tui inkarah chuan boruak zau tak a dah ta tih kan hmu a. (eng form nge a nih ang tih phei chu ka hre lem hlei lo va). Khawvel hi van boruak chung lamah khian tuiin lo hual ta pup mai se, ni sa chu direct-in leiah hian a rawn lut thei lo vang a, tui chu a chhun lum pup ang a, chu chuan khawvel temperature chu inang thapin a sem rual mai dawn a lo ni thei ta a ni. . A lum lutuk lai a awm lo vang a, vawt lutuk lai a awm bawk hek lo vang. Tunlai Sahara thlaler leh vur ram Siberia te chu boruak a inang chiah ang a, hnim hring an duah hluah mai dawn a lo ni. Scientist-te'na Siberia vur rama mammoth, hmanlai sai lian ruang an hmuh chhuah chu a pumpuiah hnim hring a lo la pai teuh mai a, vurin a lo vawng tha reng mai tih an hmu chhuak a ni. Sai lian mangkhen, tuan muang ve tak mai chuan engtin nge Siberia ram, hnim hring reng reng awm lohna chu a tlan thlen theih tehlul ang le? A chhanna chu tuilet hma kha chuan Siberia hi phul hmun hring dup mai a lo ni zawk a ni tih hi a ni. . Tin, van boruak chung lama tui awm pup mai chuan ni sa hlauhawm lutuk - radiation leh solar flares te chu a lo dang ang a, khawvelah hian natna hrik hlauawm in-mutate zung zung chi; virus, bacteria, germs te tan sterilised khawvel a nih hmel, chutiang khawvela cheng mihring han hrisel dan tur chu rura tak a ni ringawt ang. Adama, chatuana dam tura duan chu, bawhchhiatna avangin ni khat, (chu chu kum 1000) pawh dam tling lovin, thei an ei ni la la chuan thi mah sela, a dam chhung reilote kum 960 chhung khan natna hri tha lo avanga a dam loh hi a rinawm loh a ni. . Tin, Adama kha palian thelh thawlh tak pawh a nih a rinawm hle bawk a ni, a hmel that ser sawr pawh a rinawm bawk. Khawvel a ramsa zawng zawng a thunun vek theih a, saipa pawh a dara a lo chul theih dawn chuan (han mitthla ve mai ula.. ) , tun hnu zela mal-nutrition, defficiency leh natna hrik hrang hrang khawvela a lo pian tak avanga mihring lo piang zel kan hrisel lo leh kan chenbeh takna chhan hi la tawng ve dawn hek lo. . Tui a lo let a, van tukverh te a lo inhawng a, van boruak chung lama tui awm kual pup mai chu an rawn insah ta huk mai a, ni 40 leh zan 40 tunlaia kan ruahsur pangngai ang ni lo, van sanga khawvel nihliap hydrogen chu a sah ta a, lei chu a hnip ta a, chutah lei chhungrila tui tam zawk a thup bo chu an lo chik chhuak ve leh ta thung a, a rura lutuk a, khawmual an tawlh dul dul ang a, an intauh bup bup ang a, leilung innghahna lo hnipin volcano leh tsunami a siam ang a, a hmaa khawvel pum mar nalh tha zaih mai chu a lo sawngin a sawr bawk zo ta a, tlang sang leh kawr ruam an lo insiam ta a nih ber hmel. Chuti khawpa rihna leh force chu a zo lo a, 23 degree-in khawvel chu a lo awn ta a, chu chuan polar shift a siam theih hmel bawk a ni. . Lei chung langa thil hlu tak tak, rangkachak leh lunghlu te, tun hmaa Eden huana lei chunglanga awm sup sup thin te pawh chu lei chhungrilah a lo inphum ta vek a nih hmel (Ezek 28:12-16), phaizawl nuam tak tak te pawh chu kawr ruam thuk tak takah te leh hmun khawkrawk tak tak leh hmun chhengchhe tak takah te an lo chang zo ta a ni. Grand Canyon te pawh tui lian nasa lutuk hnuhma a ni tih hi a chiang a ni. Chutiang khawpa tui lian nasa avang chuan leimin leh lei tlahniamte a thlen phah nasa em em a, khawmual hi a tawlhin a tawlh dul dul mai ang a, nungcha, thing leh mau ruang leh tawih te chu lei chhungrilah a phum bo zo ta a, chungte chu tunlai fossils fuel te leh fossils an laih chhuah leh te hi an ni hlawm a ni. . Ni sa chu dangtu awm ta hek lo, hmun thenkhat chu a em ta kawk tlawk mai a, hmun lum lutuk leh thlalerah te an lo chang zo ta, a then lah chu ni em phak reng reng lohna hmun vur ram vawt lutuk, nunna awm theih lohna hmunah te an lo chang zo ta bawk a nih hmel. Tin, tuilet hma kha chuan khawvelah ruah a la sur ngai reng reng lo a nih hmel bawk. Ruah sur lovin, lei atanga tuihu lo chhuak chuan thlaite chu a chawm thin tih ziak a ni a. Pathianin Euphrates phaizawla cheng Nova hnena ‘Lawng tuk rawh, ruah ka surtir dawn, khawvel hi tuiin a chim vek dawn’ han tih chu a hun lai mite tan khan a awihawm loh dan turzia leh a nuihzatthlak dan turzia chu rura tak a ni. Nova pawh kha tunlai anga inzir sang, physics leh geography-a mi thiam chu ni sela, a awih bikin a rinawm loh. . Nimahsela, RINNA-a fak hlawh tlak, thil lo la lang lote a rin theih avangin Hebrai 11:7-a Hall of fame-ah a lang phak ta zawk a ni. Heta thil lo la lang lote a tih hi eng nge ni ta ang? Tuilet an la hmu ngai lo a, ruahsur an la hmu ngai lo a, chhimbal an la hmu ngai lo bawk a ni. Ruahsur thin tawh ni se, chhimbal an hmu fo ang a, Pathianin thil thar chhinchhiah nan a thlang kher lo vang. Ruah a lo sur ta a, a vawikhatna atan chhimbal a lo zam ta a ni. . Tuilet chuan lei thatna chu lei chhungrilah a hnawl ta vek a, thlai chauh eia chatuana nung thei tur khawpa nutritious chu a ni ta lo tawp mai, a perfect plan-a a phal loh, protein kan mamawh chu sa ei a ngai ta a, sa ei hi tuilet hnuah khan phal a ni ta chauh a ni. . Tuilet avanga lei thatna lo chhe ta lutuk leh natna hrik lo piang ta zawih zawih chu mihringin kan tuar zawh lohzia chu, bawhchhiat hnuah rau rau pawh tuilet hma kha chuan kum 900 chuang an dam thuau thuau a, tuilet hnuah erawh chuan kum 120-ah an tar thi ta bawih bawih mai a ni. A la chhe zel a nih lanna pakhat chu tunlaiah kum 80/90 chu dam rei tak an ni ta a, dam rei pawh ni se, tar chak lo, leh chhe em em mai kan ni zo ta. Hei hi tunlai supplementary food to deuh deuh siam chhuaktute hian an hre fuh a, kum 5 chuang te soil an nurture te te a, chuta thei leh thlai ten minerals an han paitam bikzia leh hrisel bikzia chu an hre fuh tlat a ni. Hetah hian Vanram, he lei ngeia Adama bawhchhiat hma ang ngei maia khawvel thar lo ding leh tura nunna thing leh nunna tuite nen hian inzawmna thuk tak an nei a, remchangah kan la sawi ang chu.......turu tak a ni dawn a nia aw....... ;) . “ He khawvel hi chang ni lo, van pawh khi vawikhat ka la sawi nghing leh dawn” tih ziak a ni e